Je treuve que celluy qui I est né soubz Capricorne despuis la my décembre jusques a la my janvier sera iracond, fornicateur, menteur et laborieux, et sera des choses estranges nourry ; il aura plusieurs crimes et expérimentera noises ; il sera gouverneur de bestes a quatre piedz ; il ne sera pas longuement avec sa femme ; il souffrera plusieurs grans aguettemens et tristesse en la jeunesse ; il habandonnera plusieurs biens et richesses ; il aura grant péril a .XV. ans ; il sera d’ung très grant couraige ; il hantera gens honnestes et sera fort riche par femmes et sera conducteur de pucelles ; ses frères feront plusieurs grants espiemens sur luy ; il vivra LXXIIII ans IV moys selon nature.

La fille qui sera née en ce temps sera honteuse et craintive ; elle surmontera ses ennemys ; elle aura des enfans de troys hommes ; elle fera beaucoup de pèlerinages en sa jeunesse, et après elle aura grans biens ; elle aura grant mal aux yeulx et sera en son meilleur estât a trente et ung ans et vivra LXX ans et quatre moys selon la nature.

Les jours de Saturne et de Mars leur seront tresbons. Les jours de Sol leur seront tresmaulvais, tant l’homme comme la femme seront raisonnables mais ils seront fort envieulx.

GLMPetit Traité d’astrologie avec les propriétés des douzes signes — ed. 1953